بانی پاکستان تحریک انصاف عمران خان کی بہن علیمہ خان پر اڈیالہ جیل کے باہر انڈے پھینکے گئے۔
علیمہ خان جیل کے باہر میڈیا سے گفتگو کر رہی تھیں جب خواتین نے ان پر دو انڈے پھینکے جن میں سے ایک انڈہ انہیں لگا۔ اس واقعے کے بعد پی ٹی آئی کارکنان مشتعل ہوگئے اور شور شرابہ شروع ہوگیا۔
پولیس نے فوری کارروائی کرتے ہوئے دونوں خواتین کو حراست میں لے کر مزید تفتیش کے لیے تھانہ ویمن راولپنڈی منتقل کر دیا۔
پولیس حکام کا کہنا ہے کہ ابتدائی تحقیقات کے بعد ہی اس بات کا تعین کیا جا سکے گا کہ انڈا پھینکنے والی خواتین کس تنظیم یا گروپ سے تعلق رکھتی ہیں اور ان کے اس اقدام کی اصل وجوہات کیا تھیں۔
دوسری جانب پی ٹی آئی کارکنان نے اس واقعے کی شدید مذمت کرتے ہوئے مؤقف اختیار کیا ہے کہ سیاسی رہنماؤں کے خلاف اس طرح کے اقدامات برداشت نہیں کیے جائیں گے۔