لاہور(نیوز ڈیسک)لاہور کی معروف ہاؤسنگ سوسائٹی پارک ویو سٹی نے اپنے مکینوں کو بڑی سہولت فراہم کرتے ہوئے اعلان کیا ہے کہ حالیہ بارشوں اور پانی کے متاثرہ گھروں کے مکینوں سے بجلی کے بل اور ماہانہ مینٹیننس چارجز وصول نہیں کیے جائیں گے۔
انتظامیہ پارک ویو سٹی کی جانب سے جاری نوٹیفکیشن میں کہا گیا ہے کہ وہ مکین جن کے گھروں کو پانی لگنے سے نقصان پہنچا ہے، ان کے لیے یہ رعایت فوری طور پر نافذ العمل ہوگی۔
نوٹس کے مطابق ان مکینوں کو بجلی کے بل اور مینٹیننس چارجز خود برداشت نہیں کرنا پڑیں گے بلکہ سوسائٹی انتظامیہ اس بوجھ کو اٹھائے گی۔
پارک ویو سٹی انتظامہ کی جانب سے جاری نوٹیفیکیشن کا عکس
پارک ویو سٹی کی انتظامیہ نے اپنے بیان میں کہا ہے کہ وہ مکینوں کے ساتھ مکمل یکجہتی کا اظہار کرتی ہے اور ان کو یقین دلاتی ہے کہ تمام مشکلات کے حل کے لیے ہر ممکن تعاون فراہم کیا جائے گا۔
انتظامیہ نے یہ بھی کہا کہ متاثرہ مکینوں کو اکیلا نہیں چھوڑا جائے گا اور ان کے ساتھ ہر سطح پر کھڑا رہا جائے گا۔
یاد رہے کہ لاہور سمیت پنجاب کے کئی شہروں میں حالیہ بارشوں اور ندی نالوں میں طغیانی کے باعث متعدد ہاؤسنگ سوسائٹیز زیرِ آب آگئی تھیں۔
اس صورتحال میں مکینوں کو بجلی، پانی اور روزمرہ سہولیات تک رسائی میں شدید مشکلات کا سامنا کرنا پڑا۔ ایسے میں پارک ویو سٹی کا یہ اقدام مکینوں کے لیے ریلیف اور اطمینان کا باعث بنے گا۔