کراچی(نیوز ڈیسک) پیپلز پارٹی کے سینئر رہنما اور سابق وزیر اعلیٰ سندھ آفتاب شعبان میرانی انتقال کر گئے۔ پیپلز پارٹی کے سینئر رہنما آفتاب شعبان میرانی کے انتقال کی تصدیق ان کے بیٹے نے کر دی۔ آفتاب شعبان میرانی کراچی کے نجی اسپتال میں زیرعلاج تھے۔
ان کی نماز جنازہ آج ہفتے کی رات 10 بجے بیت الاسلام مسجد ڈیفنس فیز فور میں ادا کی جائے گی۔ اور تدفین گزری قبرستان میں ہو گی۔ سابق وزیر اعلیٰ سندھ کا تعلق شکارپور سے تھا۔ اور وہ طویل عرصے سے کراچی میں ہی مقیم تھے۔ انہیں ایک ہفتے قبل اسپتال سے گھر منتقل کیا گیا تھا۔ آفتاب شعبان میرانی کا شمار پیپلز پارٹی کے سینئر ترین رہنماؤں میں ہوتا تھا۔
صدر مملکت آصف علی زرداری نے آفتاب شعبان میرانی کے انتقال پر تعزیت کا اظہار کرتے ہوئے کہا کہ وہ ذوالفقار علی بھٹو اور بے نظیر بھٹو کے قریبی رفقا میں سے تھے۔ واضح رہے کہ وزیر اعلیٰ سندھ سید مراد علی شاہ نے گزشتہ ہفتے کراچی کے نجی اسپتال میں پیپلز پارٹی کے سینئر رہنما آفتاب شعبان میرانی کی عیادت کی تھی۔